XXXV ÒRAN NA CLOICHE

Séisd:—

I iù ro bha hó, e him bo hà,
E him bo ruaig thu i, e him bo hà;
I iù ro bha hó, e him bo hà.

A’ Chlach a bha mo sheanmhair 4220
’S mo sheanair oirre seanchas,
Air tilleadh mar a dh’fhalbh i—
Mo ghalghad a’ Chlach!
’S gur coma leam i ’n Cearrara,
An Calasraid no ’n Calbhaidh, 4225
Cho fad ’s a tha i ’n Albainn
Nan garbhlaichean cas’;
I iù ro bha hó, etc.

’Ga cur an àite tearmainn,
A chumas i gu falchaidh, 4230
’S nach urrainn—nach dearg iad—
Air sgealb dhi thoirt as!
A’ Chlach a chaidh a dhìth oirnn
Air faighinn as an ìngnean,
’S gu deimhinne ma thill i 4235
Tha ’n nì sin gu math.
I iù ro bha hó, etc.

’S mo bheannachd air a’ mhìlidh
A tharruing as a’ chill i,
’S a dh’aiseag, tha mi cinnteach, 4240
I mìltean a-mach.
A’ Chlach a bha ’s na linntean
A’ fantainn air ar sinnsreadh
Bho ’n thàinig i dha ’n tìr so

An tìm nam fear breac. 4245
I iù ro bha hó, etc.

’S i measail ann bho ìslean
Gu ridirean is rìghrean,
Tha ’n diugh ’nan laighe ’n I
Mar a dh’innseas an leac. 4250
Gur ioma baile fuadain
A dh’amais i air chuairt ann,
A’ Chlach a bha cho buadhmhor
Bu ruadh-bhuidhe dath,
I iù ro bha hó, etc. 4255

Nach faod mi tighinn mu’n cuairt
Air a buaidh ’s air a rath,
Bho’n sguir i bhith ’na cluasaig
Aig buachaill’ a chleachd
Bhith cadal oirre suaimhneach, 4260
’S a’ faicinn ann am bruadar
Nan spioradan bho shuas
A bhith nuas oirre teachd,
I iù ro bha hó, etc.

’S mar thàinig i thar chuantan, 4265
Gum b’aithne do Choll Uais i,
Bha treis aig Olla Ruadh dhi
’S aig Duanach Mac Earc.
’S car son a bhiomaid suarach,
’S a leigeamaide bhuainn i, 4270
’S a liuthad àit’ a bhuanaich
Air chuairt dhi bhith ac’.
I iù ro bha hó, etc.

Ma thàinig a’ chlach bhuadhach
Bho aiseirigh na h-uaghach, 4275
Tha tamhasg Uilleam Uallais
A’ buannachd a’ chath.
Gur milis le mo chluasan
Gach lideadh mar a chual’ iad,

’S tha mise deanamh duanaig 4280
’S i uamhasach math.
I iù ro bha hó, etc.

Mionnan air fear deàrnaidh,
Gach màthair is mac,
Nach leig sinn ann an gàbhadh 4285
Am fear a thug á sàs i,
’S a mhiontraig air a teàrnadh
Á àite gun tlachd.
Ma chuireas iad an làmh air
Chan uilear dhuinn bhith làidir 4290
Is buille thoirt air a thàilleabh
Le stàillinn a-mach.
I iù ro bha hó, etc.

Togamaid ar bàrdachd
An àirde le snas 4295
Dha’n ghineal thug bho’n Spàinnt i,
’S ma thilleas iad gu Sgàin i
Bidh duinealas ar nàisein
Nas fheàrr ann am blas,
Bho’n rib iad i bho’n ghràisg 4300
A bha suidhe oirr’ le màsan,
’S tha tuilleadh aig na gàrlaich
Ri thàrradh air n-ais.
I iù ro bha hó, etc.

Tha ioma rud a bhàrr air 4305
A’ chloich a bh’ann an Sgàin
A dhraghadh sinn á làmhan
Nan sglàmhaidhean glas.
An duine bhios a’ tàmhachd
An cuideachd nam meàirleach, 4310
Chan uilear dha gach àirneis
A chàradh fo ghlais,
I iù ro bha hó, etc.

’S bha’m Ministear cho tùirseach
’S a’ mhadainn nuair a dhùisg e, 4315

’S praban air a shùilean
A’ tionndadh a-mach,
E coiseachd feadh an ùrlair,
Ag ochanaich ’s ag ùrnuigh,
’S a’ coimhead air a’ chùil 4320
Anns an d’ionndrainn e chlach.
I iù ro bha hó, etc.

Sin far an robh stàrachd
’S an ruith air feadh an làir ann,
Gun smid aige ri ràitinn, 4325
Ach “c’àit ’n deach a’ chlach?”
’S “a Mhuire, Mhuire Mhàthair,
Gu dé ni mis’ am màireach?
Tha fios ’am gum bi bhànrinn
A’ fàgail a beachd.” 4330
I iù ro bha hó, etc.

Gun duirt e ’s dath a’ bhàis air,
“Cha chreidinn-sa gu bràth e
Gu togadh fear bho làr e
Nach b’àirde na speach; 4335
Tha rudeigin an dàn dhomh,
’S gun cuidicheadh an t-Àgh mi,
Bha’n duine thug á sàs i
Cho làidir ri each.”
I iù ro bha hó, etc. 4340

’S cha ruitheadh e ach lùigeach,
Bha luigheinean a’ lùbadh,
Bha crith a’ tighinn ’na ghlùinean,
’S e tionndadh cho lag;
Chan fhaiceadh e le shùilean, 4345
Chan fhaigheadh e fo mhùigean,
Le corraig no le lùdaig
An dùdach no’n glag.
I iù ro bha hó, etc.

Ach ràinig e na diùidich 4350
A’ burralaich ’s a’ bùirich,

“Tha breitheanas a’ dlùthadh oirnn,
Spùilleadh a’ chlach;”
’S bha Sasunn air a dùsgadh,
’S an cathair air a rùsgadh, 4355
’S oileadhag mu na diùnlaich
A ghiùlain a’ chreach;
I iù ro bha hó, etc.

Earraidean gu siùbhlach
A’ farraid feadh na dùthcha, 4360
Bho Ghlaschu gu Diùraidh,
Bho Mhùideart gu Peairt,
’S cha leig iad bàrr an dùirn
A dhol seachad air an sùilean,
Cha leig iad inneal-ùillidh, 4365
No brùid air ’m bi cairt.
I iù ro bha hó, etc.

’S na h-earraidean is colg orr’
Bho sholus gu rath-dorcha,
Gun fhois orr’ ach a’ sporghail, 4370
’S a’ forfhais a-mach;
’S ged ruigeadh iad am morghan
Ann grinneal Abhainn Orchaidh,
’S ged thigeadh na Fir Bholga,
Cha lorg iad a’ chlach. 4375
I iù ro bha hó, etc.

Tha Deasaich agus Tuathaich
A’ ceileireadh gu h-uallach,
Air mhire leis an uamhar
Gun d’fhuair sinn a’ chlach. 4380
Nuair thàinig i á Éireann
Bha cantanas m’a déidhinn,
Gum fanamaid ri chéile
Ma ghléidh sinn a’ chlach.
I iù ro bha hó, etc. 4385

’S na faigheamaid le réit’ i
Cha rachamaid ’s an éirig,

’S ann againne bha reusan
Bhith ’g éigheach “Mo chreach!”
Ach b’aindeoineach an ceum leoth’ e, 4390
’S b’annasach leam fhéin e,
’S e barrantas an treud ud
Gach seud thoirt a-mach;
I iù ro bha hó, etc.

Ged ghealladh iad le ’m beul e, 4395
Cha deanadh iad da réir sin;
An car a bha ’s a’ Bheurla
Gur léir do gach neach.
I iù ro bha hó, etc.

An t-séisd ann an dòigh eile:

’S i iù ro bha hó ro hill i em bo hà, 4400
Hill i em bo ruaig thu i, hill i em bo hà,
’S i iù ro bha hó ro hill i em bo hà.