XLII ’S FHEUDAR GUN BHITH ’G ÒL

’S fheudar gun bhith ’g òl,
No a bhith an tigh na dibhe;
Tha i nise cho daor
’S nach eil saod a bhith rithe.
’S fheudar, etc. 4965

’S fheudar sgur dhe’n àbhachd,
’S gach cleachdadh a b’àbhaist
Bho’n a theachd oirnn gràisg
A th’air an t-àit’ a mhilleadh.
’S fheudar, etc. 4970

Thàinig gràisg as ùr oirnn,
Rud nach fheàrrd an dùthaich,
’S cha b’e an t-àgh a stiùir sinn
A chuir diù ’nam bruidhinn.
’S fheudar, etc. 4975

Gheall iad air gach taobh dhinn
Sìth thabhairt air an t-saoghal,
Bhiodh gach nì cho saor,
’S gum biodh na daoin’ air mhire.
’S fheudar, etc. 4980

Ach mu’n gann a fhuair iad
Ughdarras an t-sluaigh,
’S ann thionndaidh iad mu’n cuairt
Cho luath ri gille-mirean.
’S fheudar, etc. 4985

Dh’fhàg iad sinn ’nar n-éiginn,
Sinn gun bhiadh, gun éideadh;

Chan eil sìos mu m’shléisdnean,
Ach am bréid ’s am pillean.
’S fheudar, etc. 4990

Rinn sinn suas an armailt
Leis an sguabt’ a’ Ghearmailt,
’S cha do bhuannaich Albainn,
Ged is marbh a gillean.
’S fheudar, etc. 4995

Arm aca air a dhianamh,
’S falbhaidh e tromh’n iarmailt,
’S chan eil àit an teid fhiachainn
Nach bi crìoch air millean,
’S fheudar, etc. 5000

’S tha sinn gun bhuntàta,
Chan eil ìm no càise;
Chan eil giadh no ràcan
Bhios air Càisg no Inid.
’S fheudar, etc. 5005

Chan eil fad mo lùdaig
Ann am broinn mo spliùcain;
Far’m bu mhinig ann pùnnd
Chan fhaicear ùnns’ ann tuilleadh.
’S fheudar, etc. 5010

Blàth uisge nam buadh
Cho tearc an làmh an t-sluaigh,
’S nach fhaic mi làn na cuaich’
A thogadh suas mo chridhe.
’S fheudar, etc. 5015

Saoil nach tùrsach dhòmh-sa
Coimhead bùth an òsdair,
’S mi gun dùil ri stòp
Le pòca tha gun sgillinn.
’S fheudar, etc. 5020