48 Laoidh Fhionnlaigh Oig

Rinn Fionnlagh Og MacCuithinn an laoidh seo an 1842 (Urr. N. MacC.)

Bha sgeula air fhoillseachadh LINEBREAK Air machaire nan coilltichibh, LINEBREAK Is buachaillean na h-oidhche LINEBREAK Ghabh oillt is crith fheòla.

“Na gabhaibh an sgàth dheth!” LINEBREAK ’S e thubhairt na h-aingle; LINEBREAK “Tha slàinte air foillseadh” LINEBREAK Bha seinn tighinn à Glòir ann.

“Is rugadh an tràth s’ dhiubh LINEBREAK Ann am baile Dhaibhidh LINEBREAK An Slànaighear gràsmhor LINEBREAK San stàball neo-dhòigheil”

“Gu ceartas a dhìoladh” LINEBREAK ’S gu saoradh o phiantaibh, LINEBREAK ’s an lagh a choilìonadh LINEBREAK Mar dh’iarradh on òige

Bha reulta na h-oidhche LINEBREAK Mar chomharra cinnteach LINEBREAK ’S i falbh le a soillse LINEBREAK Ro Dhraoidhean an dòchais.

Bha thrusgan cho suarach LINEBREAK ’S e paisgte mu chuairt da LINEBREAK ’S cha sheòmar duin’ -uasail LINEBREAK A fhuair e gu còmhnaidh.

Cho luaithe chaidh inns’ do LINEBREAK Luchd-àitich na tìre, LINEBREAK Bha ’n cridhe fo mhì-ghean LINEBREAK An Rìgh gun bhith dòigheil.

Thàinig guth anns an oidhche LINEBREAK Gu Iòsaph: “Gabh greum air LINEBREAK Is falbh leis an naoidhean – LINEBREAK Tha nàimhdeas cho mòr da!”

Bha ’n sgeul ud cho prìseil LINEBREAK Cha d’fhan i san tìr sin LINEBREAK Tha i ’g imeachd sna h-Innsibh LINEBREAK ’S h-uile mìr den Roinn-Eòrpa.

Is thàinig i ’n taobh sa LINEBREAK Cha d’fhàgadh air chùl i: LINEBREAK Tha slàinte ri fhaotainn LINEBREAK Do dh’aois is do dh’òige.

Cha dèan beatha no bàs e, LINEBREAK No nì eile ’n làthair – LINEBREAK Ar sgaradh gu bràth LINEBREAK O Ard-rìgh na glòire.

Chan fhaca ’s cha chuala, LINEBREAK Chan urrainn neach luaidh air – ’N sonas tha shuas ann LINEBREAK Don t-sluagh a gheibh còir air.